KOTA KINABALU: Ontok 12 Feb 2022, pinotimpuun iho’ Kursus nokomoi, ontok Misa’ tinoguvang di Archbishop John Wong om Fr Nicholas Stephen, mononontuduk sunduvan Komisi, doiho’ id Archdiocesan Centre, Kota Kinabalu. Tanda’ kopotimpuunan diho’ KEP2 Sabah, vinahad di Archbishop John Wong ii tunggu diho’ KEP2, sinasi’ dii papapaanjul ngaavi’ diho’, hahansanon ngaavi’ papapanau om sontob dii pointindapou diho’ KEP2, ii pinotimpuun ontok Feb 2022, om papanaon ontok tikid sodop tadau Koiso’ om Kotohu, mantad jam ko-8 gisom ko-10.30 doungosodop, id online gisom vuhan Jun 2022.
Kopongo ii Misa’ kopotimpuunan diho KEP2, pinoombitan di Archbishop John Wong doid dii 26 hahansanon ii Buuk Misi Evangelisasi om Evangelii Nuntiandi.
Iso’ dii nongoboos di Archbishop, do ontok dii kopotimpuunan diho kursus, nopo nga’ kahansanan disido do sontob dii pointindapou, nopo nga’ kaanu tumanud dii papapaanjul ngaavi’ diho’, do mongindahom do koginavaan dioho’ doid di Tuhan om di Jesus, Lahan, Katapatan om Koposizon; om pavakason do kuasa’ di Spiritu Tobitua; om do kaanu mogovit do toihaan dioho’ kumaa’ doid tuhun ngaavi’ tasaamaanan dioho’ do id koposizon dioho’ tikid tadau.
Monongkotohuod tokou doid di Tuhan tu’ kaanu papaanjul diti KEP 2 Sabah, do kopongo o duvo vuhan minoguhud do KEP Koiso, id dii vuhan Nov di toun. Noboos di Poniikoon Papaanjul diti kursus nokomoi, Sr Dariah Ajap fsic, do tema diti KEP2 Sabah online nopo nga “I Jesus Lahan, Katapatan om Koposizon”; kosudong kozo iti do pinanau di eklizia, ii popoosoto do tohu ahal: Kaampazan, Kopiisaan om Misi, miampai kahansanan do ii singintindapou nopo nga’ kaanu momuuan dioho’ sondii’ do minsomok kozo di Jesus sumusui do Lahan, Katapatan om Koposizon om do kaanu papabaagi dii Abal Tavasi’ kumaa’ doid tuhun ngaavi’.
Ogumu’ pointindapou toi ko poinlijistol diti kursus tu’ 154 tuhun mantad pototongkop Sabah: 100 mantad Diosis Kota Kinabalu, Diosis Keningau 31, Diosis Sandakan 21 om Diosis Kuala Lumpur nopo nga duvo tuhun. Binaagi izioho’ do id tinimungan; kivaa buuan papapanau do potitikid tinimungan. Mantad diho’ 154 pointindapou, 25 dioho’ om komuhakan.
Monongkotohuod i Poniikoon Papaanjul diti, kumaa’ doid di Archbishop tu’ sabap no do sokodung disido doid koonjulan diti KEP id Archdiosis Kota Kinabalu, naamung do tinimungan mantad Diosis Keningau om Sandakan. Kotohuadan nogi’ doid di Bishop Cornelius Piong mantad Diosis Keningau om Bishop Julius Gitom mantad Diosis Sandakan sabap no do sokodung dioho’ doid kopoonjulan diti KEP2, miampai minono-Misa’ do poguhu pinopougad diho’ hahansanon ngaavi’ dioho’ doid diti KEP2 Sabah Online. – Sr Dariah fsic